ភ្នំពេញ៖ អភិបាលរាជធានីភ្នំពេញបានប្រកាសឈ្មោះស្ពានអាកាសទី៩ ដែលតភ្ជាប់ពីមហាវិថីសម្ដេចតេជោហ៊ុនសែនទៅព្រលានយន្តហោះអន្តរជាតិភ្នំពេញថ្មីនៅក្រុងតាខ្មៅខេត្តកណ្ដាលថា «ស្ពានអាកាសសម្តេចធិបតី ហ៊ុន ម៉ាណែត»។
ការប្រកាសនេះធ្វើឡើងក្នុងពិធីបើកការដ្ឋានសាងសង់ស្ពានអាកាសទី៩ថ្មីក្នុងរាធានីភ្នំពេញ ព្រឹកថ្ងៃទី១៧ ខែមិថុនានេះ ដោយលោក ឃួង ស្រេង ថា ដើម្បីតបស្នងចំពោះការបន្តគំរូវីរភាពដឹកនាំ ប្រកបដោយភាព ស្វាហាប់ សមត្ថភាព ថាមពល បញ្ញាញាណ រស់រវើក និងមានប្រសិទ្ធភាពរបស់ សម្តេចធិបតីនាយករដ្ឋមន្ត្រី។
ស្ពានអាកាសសម្តេចធិបតី ហ៊ុន ម៉ាណែត គឺជា ស្ពានអាកាសទី១ ដែលត្រូវបើកការដ្ឋានស្ថាបនាក្នុងអាណត្តិរាជរដ្ឋាភិបាល នីតិកាលទី៧ នៃរដ្ឋសភា នឹងត្រូវជាស្ពានទី៩ដែលបានសាងសង់ក្នុងរាជធានីភ្នំពេញ៕
